Gipadayag sa Bukidnon Police Provincial Office nga mikunhod ug manageable ang kaso krimenalidad sa lalawigan, samtang giandam ang kapulisan alang sa pagdaghan sa mga bisita karong Ber months.
Sumala kang PCOL Oliver Sotto Navales, hugot nga gipalapdan ang kampanya batok sa iligal nga droga, smuggling ug mga wanted person sa probinsya.
Usa sa ilang bag-ong accomplishment mao ang pagkadakop sa most wanted person nga number five sa regional level ug number four sa municipal level, nga nag-atubang og kaso nga statutory rape.
Giingon ni Navales nga andam ang kapulisan sa pagdawat ug pag-accommodate sa mga lokal ug langyaw nga turista nga motambong o mobisita sa nagkalain-laing tourist destinations sa Bukidnon.
Samtang, gipunting sa BukPPO ang mga road crash incident nga usa sa padayong ginamonitor sa probinsya, ilabina sa mga accident-prone areas. Matud ni Navales, importante ang pag-amping sa mga motorista tungod sa kondisyon sa mga karsada ug sa posibleng paglapas sa traffic rules.
Sa iyang mensahe, gihangyo ni Navales ang padayong kooperasyon sa mga lokal nga opisyal, barangay officials ug katawhan aron mas dali maresolba ang mga insidente ug mapadayon ang kalinaw sa Bukidnon.