COMELEC Chair Garcia suporta sa panawagang dili buwisan ang honoraria sa mga magtutudlo sa eleksyon

Gisuportahan ni Commission on Elections (COMELEC) Chairman George Erwin Garcia ang panawagan sa mga magtutudlo nga kuhaan o tangtangan og buwis ang ilang honoraria o bayad sa ilang serbisyo matag eleksyon.

Sa iyang pamahayag, giingon ni Garcia nga makiangayon lamang nga dili na buwisan ang mga magtutudlo nga nagpakita og dakong sakripisyo aron masiguro ang malinawon ug hapsay nga eleksyon.

Apan iyang giklaro nga ang desisyon niini mag-agad gihapon sa Kongreso, tungod kay sila lamang ang adunay gahum sa pag-amendar sa kasamtangang balaod may kalabotan sa pagbuwis. Nanawagan usab siya sa mga mambabalaod nga hatagan og aksyon ang hangyo sa mga magtutudlo isip pag-ila sa ilang hinungdanong papel sa proseso sa eleksyon.