Gipakita sa Bukidnon State University (BukSU) ang lig-on nga paningkamot sa pagpalig-on sa episyente ug matinud-anong serbisyo publiko pinaagi sa pagsaulog sa Ease of Doing Business (EODB) Month, nga opisyal nga gisugdan sa flag ceremony niadtong Lunes.
Ang EODB Month usa ka dakong lakang nga nagtumong sa pagwagtang sa red tape ug pagpasiugda sa kalidad nga serbisyo — lakang nga gisabayan sa tibuok nasud ilawom sa tema nga, “From Red Tape to Red Carpet: Better Business Movement in a Bagong Pilipinas.” Dili lang kini selebrasyon sa awards apan usa ka pahinumdom sa papel sa BukSU isip institusyon sa edukasyon nga nagserbisyo dili lang sa mga estudyante, kundi apil na ang komunidad, faculty, ug uban pang stakeholders nga nagkinahanglan og klaro, dali, ug patas nga serbisyo.
Gipasiugdahan sa BukSU ang Gantimpala Agad Initiative, diin giila ang mga yunit nga nagpakita og labing taas nga marka sa Client Satisfaction Measurement Report (CSMR). Apan labaw pa sa pasidungog, ang programa misilbing paningkamot aron ipakita nga ang BukSU committed sa service excellence ug accountability — mga prinsipyo nga sentro sa tinuod nga pag-alagad sa katawhan.
Sumala sa mga opisyal sa Human Resource Management Unit ug sa Office of the Vice President for Administration and Finance, ang maong inisyatiba usa ka tin-aw nga mensahe nga ang BukSU dili lang molihok kung kinahanglan, apan naglihok bisan pa sa wala pa kini pangayua — usa ka timaan sa responsive ug proactive nga panggamhanan sa sulod sa unibersidad.