Subling naisbog ang gipaabot nga Barangay ug Sangguniang Kabataan Elections (BSKE) nga gitakda niadtong milabayng tuig.
Kini human gikumpirma ni Atty. Danilo N. Dividina, Election Officer sa COMELEC sa Malaybalay, ang pagka-usab sa eskedyul base sa bag-ong balaod nga gipatuman.
Sa usa ka pakighinabi, gipasabot ni Atty. Dividina nga pinaagi sa Republic Act 12232 nga giduso sa Kongreso, ang eleksyon nga orihinal nga gitakda sa Disyembre 2025, gibalhin na ngadto sa unang Lunes sa Nobyembre 2026.
Dugang pa sa abogado nga ang maong kausaban o postponement maoy usa ka gahum o prerogative sa Kongreso.
Gipatin-aw niini nga isip tigpatuman sa balaod, ang COMELEC igo lamang mosunod sa bisan unsang kamanduan nga giduso sa Kongreso ug gipirmahan sa Presidente.
Bisan pa man sa tinguha sa ahensya nga madayon ang maong eleksyon, kinahanglan nilang tumanon ang Republic Act 11232 nga nagmando sa pag-uswag sa eleksyon ngadto sa Disyembre 2025.
Kahinumduman nga ang maong lakang nakakuha og suporta gikan kang Senadora Imee Marcos tungod sa tinguha nga unahon ang pagtubag sa seryosong hagit sa ekonomiya ug krisis sa lana kaysa sa pagpahigayon sa piniliay.
Gipasiugda sa senadora nga ang mokabat ₱16-bilyon nga pondo alang sa BSKE mas mapuslan kon idirekta sa seguridad sa pagkaon ug uban pang dinalian nga serbisyo publiko alang sa katawhan.
Tungod niini, magpabilin una sa ilang katungdanan ang mga kasamtangang opisyal hangtod sa Nobyembre 2026 aron mahatagan og higayon ang gobyerno nga mapalig-on ang panalapi sa nasud.