Bodega sa mga mag-uuma nga nagkantidad og ₱3-M paubos, libre na sa buhis sa kabtangan – DA ug DILG

Libre na sa real property tax o buhis sa propiedad ang mga kwalipikadong bodega ug pasilidad sa umahan nga duna la’y assessed value nga ₱3 milyon paubos. Kini human pormal nga gipirmahan nilang DA Sec. Francisco “Kiko” Tiu Laurel Jr. ug DILG Sec. Jonvic Remulla ang usa ka Joint Memorandum Circular subay sa implementasyon sa Sagip Saka Act. Ubos sa maong kamanduan, kadtong mga estruktura nga gigamit sa paghipos og abono, liso, ug mga agrikultural nga abot ang dili na pabayron og buhis aron matabangan ang mga mag-uuma, mangingisda, ug mga kooperatiba. Gilauman nga makadaginot ang mga mag-uuma og ₱500 hangtod ₱12,000 matag tuig diin mamahimo kining magamit isip dugang puhunan sa dekalidad nga liso o modernong ekipo aron malikayan ang pagka-usik sa mga ani. Tungod niini, gimandoan na sa DILG ang mga lokal nga kagamhanan (LGUs) sa pag-update sa ilang local tax ordinances karong ikatulong kwarter sa tuig alang sa dinalian nga pagpatuman niini.