Gipadayag ni Senador Rodante Marcoleta nga usa ka dakong lakang padulong sa pagpanubag ang gihimong pagdungog sa Senate Blue Ribbon Committee mahitungod sa giingong anomaliya sa flood control projects.
Sumala ni Marcoleta, nakahatag og higayon ang maong pagdungog aron madungog sa publiko ang testimonya sa 18 ka kanhing sundalo ug security aides ni kanhing Ako Bicol Party-list Representative Elizaldy Co bahin sa giingong pagdala og dagkong kantidad sa kwarta nga konektado sa mga proyekto sa gobyerno.
Gumikan nga mga alegasyon pa kini ug kinahanglan pa og dugang imbestigasyon, gipasabot ni Marcoleta nga dili igo ang simpleng pagdenay sa mga nalambigit ug kinahanglan ang patas ug luwas nga pagsusi.
Giakusahan usab ni Marcoleta ang kampo nila Senator Vicente Sotto III ug Acting Senate President Sherwin Gatchalian nga misulay matud pa sa pagpahunong sa pagdungog pinaagi sa giingong pag-angkon sa kontrol sa mga komite sa Senado.
Dugang pa niini nga kinahanglan magpadayon ang imbestigasyon tungod kay bilyon-bilyong piso nga pondo sa gobyerno ang anaa sa sentro sa maong isyu.