Nagpadayon karon ang Commission on Elections (Comelec) Malaybalay sa ilang hugot nga preparasyon alang sa Barangay ug Sangguniang Kabataan Elections (BSKE) sa Nobyembre 2026, taliwala sa mga hisgot-hisgot bahin sa posibleng pag-postpone niini.
Sa pakighinabi kang Atty. Danilo N. Dividina, Election Officer sa Comelec Malaybalay, gipasabot niini nga samtang wala pay pinal nga balaod nga nagmando sa pag-uswag sa eleksyon, nagpabilin silang nagsunod sa Republic Act 12232. Ubos niini, gikatakda ang eleksyon sa unang Lunes sa Nobyembre 2026.
Nasayran nga miabot na sa halos 10,000 ang mga aplikante sa voter registration sukad niadtong Oktubre 2022. Hinuon, giklaro ni Dividina nga dili tanan niini madugang sa opisyal nga listahan tungod sa nagpadayon nga deactivation sa mga botante nga napakyas pagbotar sa duha ka sunod-sunod nga eleksyon, ug ang pagtangtang sa mga “double o multiple registration.”
Gihinumdoman usab sa Comelec ang publiko nga ang rehistrasyon molungtad na lamang hangtod karong Mayo 18. Andam na ang ilang buhatan sa gilaumang dagsa sa mga tawo sa katapusang adlaw sa deadline. Padayon usab ang ilang gihimong satellite registration sa mga lagyong barangay aron mas mapadali ang pagpalista sa mga kwalipikadong botante.