Target sa House of Representatives nga susihon ang bank records ni Vice President Sara Duterte isip kabahin sa impeachment proceedings, sumala ni House Deputy Speaker Rep. Paolo Ortega.
Sumala sa mambabalaod nga seryoso ug makabalaka ang mga alegasyon nga gilakip sa ika-upat nga impeachment complaint.
Base sa pipila ka claims, adunay mga bank accounts, properties ug mga transaksiyon sa kuwarta nga wala matud pa maapil o maideklarar sa Statement of Assets, Liabilities and Net Worth (SALN) sa Bise Presidente.
Sa ika-upat nga impeachment complaint nga gisang-at niadtong Miyerkules, giakusahan ang Bise Presidente og betrayal of public trust ug culpable violation of the Constitution.
Matod ni Ortega, kung gimandato ang mga public officials nga ideklarar ang tanang assets ug magkinabuhi nga simple, ang bisan unsang “material omission” mabutang nga seryoso nga constitutional concern nga dili angay balewalaon sa House of Representatives.