Giaprubahan na ang kinatibuk-ang 437 ka slots alang sa mga programa sa panarbaho sa dakbayan sa Malaybalay, diin 140 niini ang alang sa Special Program for Employment of Students (SPES) ug 297 usab alang sa Work Appreciation Program (WAP).
Sa pakighinabi sa Bombo Radyo Malaybalay ngadto kang Atty. Anna Marie R. Bergado, ang Manager sa Public Employment Service Office (PESO) Malaybalay, iyang gibutyag nga mokabat sa 1,800 ka mga aplikante ang ningsalmot sa online application. Aron masiguro ang patas nga kahigayonan, migamit ang buhatan og “roleta-based” nga sistema sa pagpili sa mga magmadaugon.
Tumong sa maong programa nga matabangan ang mga estudyante ug out-of-school youth nga makabaton og kitang magamit alang sa enrollment, school supplies, ug uban pang adlaw-adlaw nga galastuson. Prayoridad sa PESO ang mga indigent nga kabatan-onan, lakip na ang mga Persons with Disabilities (PWD) ug Indigenous Peoples (IP) gikan sa 46 ka barangay sa dakbayan.
Ang mga mapili ideploy sa City Agriculture Office, CENRO, mga tulunghaan, ug mga barangay hall alang sa seedling bagging, school maintenance, ug uban pang serbisyo sa komunidad. Ang mga SPES beneficiaries motrabaho sulod sa 20 ka adlaw nga dunay suweldo nga ₱7,669.60, samtang ang mga anaa sa WAP motrabaho og 10 ka adlaw nga dunay madawat nga hapit ₱5,000.
Gikatakda ang orientation sa mga napili sa sunod semana, samtang ang pormal nga deployment magsugod na karong bulan sa Mayo isip kabahin sa paningkamot sa kagamhanang lokal ug DOLE sa paghatag og temporaryong panginabuhian sa kabatan-onan.