Giklaro karon sa suspek sa pagpanghulga sa usa ka booth sa Capitol Grounds nga wala niya hulgaa ang biktima ug igo lamang kining gitudlo tungod sa kasuko human matud pa natumba ang iyang tiguwang nga inahan.
Sa pakighinabi sa Bombo Radyo Malaybalay, gipahayag ni alyas Onyok nga nasaypan lamang og sabot ang iyang aksyon nga gihubad sa biktima isip usa ka seryosong bahad. Matud sa suspek, wala siya’y plano nga mopasakit, apan nadala lamang siya sa iyang emosyon sa dihang nakita niini ang iyang 60-anyos nga inahan nga natuklod atol sa ilang panaglalis sa tag-iya sa booth.
Gidugang pa ni Onyok nga igo lamang silang nangayo og tabang para sa ilang pamasahe paingon sa Davao ug wala siya magdahom nga mosangpot sa iyang pagkapriso ang maong komprontasyon. Sa pagkakaron, gawas sa iyang pagpangayo og pasaylo, mas dako ang kabalaka sa suspek sa iyang asawa ug gamay’ng anak nga nahanaw ug wala na makit-i sukad siya nabalhog sa bilanggoan.