Padayon nga mosulod sa mas aktibong yugto ang impeachment trial batok kang Vice President Sara Duterte, diin gilauman nga mas daghan pang mga testigo ang motambong sa pagpadayon sa pagdungog karong semanaha.
Lakip sa gilauman nga motestigo sila NBI Regional Director Jeremy Lotoc, Office of the Vice President Chief of Staff Atty. Zuleika Lopez, ug Belinda Bello sa Legislative Security Bureau sa House of Representatives.
Gisuportahan ni Senador Ping Lacson ang ideya nga ipa-standby na sa Senado ang mga sunod nga testigo aron dili mausik ang oras kon sayo mahuman ang pagpamatuod sa usa ka testigo.
Matud ni Lacson, kinahanglan ang paspas nga proseso apan dili makompromiso ang presentasyon sa mga ebidensya.
Samtang, gipadayag ni Impeachment Court Presiding Officer Senador Francis “Chiz” Escudero nga gilauman niini nga mahuman ang impeachment trial sa dili pa moabot ang Nobyembre o Disyembre, apan nagdepende gihapon kini sa gidaghanon sa mga ebidensyang ipresentar sa duha ka kampo.