Gipasalig sa Department of Public Works and Highways (DPWH) nga ang tanang bag-ong flood control projects nga ipatuman ilalom sa ilang departamento ipailalom sa hugot nga pagmonitor ug siguruhong mosunod sa hustong proseso ug plano.
Sumala kang DPWH Secretary Vince Dizon, kon maghimo man og bag-ong mga plano para sa flood control projects, siguruhon nga bantayan kini pag-ayo ug ipatuman sa hustong paagi.
Gipunting usab sa kalihim nga apil ang syudad sa Iligan sa mga lugar nga pagabuhatan og maong mga proyekto.
Miagi sa grabe nga pagbaha ang Iligan atol sa Bagyong Basyang, diin lima ka persona ang namatay tungod sa kalit ug paspas nga pagsaka sa tubig-baha.
Gawas niini, misaad usab si Dizon nga gamiton ang maong higayon aron sa pagplano sa mga proyekto para sa 2027, ug sugdan na ang pagtukod sa mga istruktura nga gikinahanglan sa katawhan, ilabi na sa mga lugar nga kanunay mabahaan.
Samtang, base sa monitoring sa DPWH, gawas sa Iligan, nanginahanglan usab og flood control projects ang Cagayan de Oro, Cotabato ug Maguindanao tungod sa daghang mga lugar didto nga gikumpirmang flood-prone.