Tinggong karon sa selda sa kapulisan ang usa ka bag-ong nailhang drug personality human kini malampusong nadakpan sa gikasang operasyong buy-bust didto sa Purok 1, Barangay Camp 1, Maramag, Bukidnon niadtong Hunyo 13.
Giila sa mga awtoridad ang suspetsado sa alyas nga “Makong,” 40-anyos. Narekober gikan sa iyang posisyon ang siyam ka sachet sa gidudahang shabu nga may kinatibuk-ang gibug-aton nga 5.5 gramos ug nagkantidad og ₱37,400, lakip ang buy-bust money ug usa ka cellphone.
Ang maong malampusong lakang gipahigayon sa mga operatiba sa Maramag Municipal Police Station (MPS), inabagan sa Bukidnon 2nd Provincial Mobile Force Company ug Bukidnon Provincial Intelligence Unit.
Sa kasamtangan, ang suspetsado nagpabilin sa kustodiya sa Maramag MPS alang sa saktong dokumentasyon, samtang ang mga nakumpiskang ebidensya gidala na sa Bukidnon Provincial Forensic Unit alang sa laboratory examination isip pagpangandam sa ipasaka nga kasong paglapas sa Republic Act 9165 batok kaniya.