Nakabsan sa hinulamang kinabuhi sulod sa ospital ang babayeng biktima sa hit-and-run incident nga nahitabo sa KM-4, Barangay Casisang, Malaybalay City pasado alas 7:40 sa gabii, kagahapong adlawa.
Giila ang biktima nga si Helen, 50 anyos, biyuda ug residente sa Purok-9, Barangay Casisang. Samtang ang duha ka sakyanan nga gituohang nalambigit sa insidente mao ang puti ug pula nga pick-up nga wala pa matino ang mga drayber.
Base sa mga saksi, mitabok ang biktima sa dalan padulong sa pikas bahin sa karsada dihang kalit kini nabanggaan sa usa ka puti nga pick-up nga gikan sa sentrong bahin sa syudad. Tungod sa kusog nga impact, natumba ang biktima sa dalan.
Paglabay sa pipila ka minuto, nabanggaan usab kini sa laing pula nga pick-up nga wala usab masuta ang plaka sa sakyanan.
Gidala pa sa ospital ang biktima pinaagi sa mga niresponde nga rescue personnel, apan wala na kini maluwas tungod sa grabeng samad nga naangkon.
Sa pagkakaron, nagpadayon ang imbestigasyon sa kapulisan ug nanawagan sa publiko nga makatabang sa pag-ila sa mga sakyanan ug mga drayber nga nalambigit sa maong hit-and-run.