Gitambagan ni kanhing Integrated Bar of the Philippines (IBP) President Atty. Domingo Cayosa si Senador Rodante Marcoleta nga basahon pag-usab ang Anti-Plunder Law.
Kini human gipugos ni Marcoleta nga dili siya mahimong kasohan og plunder tungod kay ang iyang nadawat nga campaign donations dili matud pa public funds.
Matod ni Cayosa, dili awtomatikong mapapas ang posibleng plunder case base lamang sa maong depensa.
Gipasabot niini nga ang giangkon ni Marcoleta nga ₱75 milyon nga nadawat nga pondo, nga wala nalakip sa iyang Statement of Assets, Liabilities, and Net Worth (SALN), mahimong ikonsiderar isip ill-gotten wealth ug mahimong mosangpot sa kasong plunder.
Dugang pa sa abogado, tungod kay gikumpirma na sa Commission on Elections (COMELEC) nga dili kini mahimong campaign donation, kinahanglan unta kining giapil sa deklaradong kabtangan sa senador.
Matod ni Cayosa, ang wala pagdeklarar sa maong kantidad sa SALN ug Statement of Contributions and Expenditures mahimong makapasamot sa legal nga kahimtang ni Marcoleta, nga posibleng atubangon ang kasong plunder.