Boluntaryong mitahan sa mga awtoridad ang laing suspek nga nalambigit sa usa ka kaso sa pagpanigbas sa lungsod sa Talakag, Bukidnon, kagahapong adlawa Hulyo 2.
Ang suspek usa ka 50-anyos nga lalaki nga mitahan sa Talakag Municipal Police Station ug miangkon nga siya ang responsable sa maong krimen.
Matud sa imbestigasyon sa kapulisan, ang insidente nahitabo pasado alas-2:00 sa kadlawon diin usa ka 44-anyos nga lalaki ang nakaplagang patay sa Sitio Inangay, Barangay 1, Talakag, Bukidnon.
Nasayran nga ang biktima nakaangkon og daghang samad-tinigbasan, lakip na sa luyo sa ulo ug sa duha ka abaga, nga maoy hinungdan sa iyang kamatayon.
Human sa boluntaryong pagsurender, anaa na karon sa kustodiya sa Talakag Municipal Police Station ang suspek samtang ginaandam ang kasong Murder nga ipasaka batok kaniya.
Kini na ang ikaduhang boluntaryong pagsurender sa usa ka suspek nga nalambigit sa manag-laing kaso sa pagpanigbas sa Talakag sulod lamang sa pipila ka adlaw.
Kahinumduman nga una nang mitahan ang suspek sa pagpanigbas-patay sa usa ka 16-anyos nga inahan sa Sitio Nataring, Barangay Dagundalahon, nga nahitabo niadtong Hunyo 28, 2026.
Ang maong suspek giturn-over usab sa Talakag Municipal Police Station pinaagi sa mga lokal nga lider sa komunidad aron atubangon ang kasong Murder.