Napakyas ang tinguha sa Pinay tennis star nga si Alex Eala nga makaabante sa semifinals human kini mapildi batok sa pambato sa Colombia nga si Camila Osorio sa quarterfinal round sa WTA 125 Philippine Women’s Open 2026 nga gipahigayon sa Rizal Memorial Tennis Center.
Natapos ang kulba-hinam nga kumbati sa iskor nga 4-6, 4-6, pabor kang Osorio.
Sa unang set, nakapakita pa og maayong labok si Eala apan daling nakabawi si Osorio pinaagi sa iyang lig-on nga depensa ug mga baseline shots. Sa ikaduhang set, misulay pa sa paggukod ang 20-anyos nga Pinay ug gani nakatabla pa kini sa iskor nga 4-4, apan mas namintaha ang kasinatian ni Osorio kinsa maoy mikuha sa katapusang duha ka mga games aron selyohan ang kadaugan.
Bisan pa man sa iyang kapildihan, dako gihapon ang pagdayeg sa mga sumosunod ni Eala tungod sa gipakita niining kasingkasing sa korte, ilabi na nga siya ang nahimong highest seed sa maong torneyo human mapalagpot ang pipila ka mga top players.
Sunod nga dulaon ni Eala mao ang WTA 500 Mubadala Abu Dhabi diin gihatagan siya og wildcard entry. Samtang si Osorio, moabante na sa semifinals aron makig-atbang kang Solana Sierra sa Argentina.
Nagpabilin ang garbo sa mga Pilipino alang kang Eala, kinsa mipakita nga kaya na sa mga Pinoy ang makig-atbang sa mga de-kalibreng tennis players sa tibuok kalibutan.