Usa ka makasaysayanong pagbalik ang gihimo ni Agnès Callamard, ang kanhi United Nations Special Rapporteur on extrajudicial killings ug kasamtangang Amnesty International secretary-general, sa Pilipinas aron makigtagbo sa mga pamilya sa mga biktima sa madugoon nga kampanya ni kanhi Presidente Rodrigo Duterte batok sa ilegal nga droga.
Kini ang labing una niyang pagbisita sukad sa tuig 2017, human siya gipahamtangan og immigration ban sa administrasyong Duterte.
Ang maong ban gikuha niadtong Setyembre, ug si Callamard gikatakdang magpabilin sa nasud gikan Nobyembre 19 hangtod Nobyembre 22 karong semanaha.
Sa usa ka pahayag, gipadayag ni Callamard ang iyang kalipay ug katuyoan sa iyang pagbalik.
“I’m delighted to be able to return to the Philippines, a country close to my heart where I have many friends. I am moved to meet once again with victims and survivors of Duterte’s so-called ‘war on drugs’ and pay tribute in person to their incredible courage and resilience,” matud niya.
Gawas sa mga pamilya sa biktima, makigtagbo usab si Callamard sa mga abogado nga kritiko sa “war on drugs” ug mga mamamahayag nga nagtabon ug nag-imbestiga sa kampanya sa kanhi presidente.
Gihulagway niya ang iyang pagbisita isip usa ka “historic time” tungod sa nagkaduol nga paghusay ni Duterte sa The Hague.
“This long overdue visit comes at a historic time, with Duterte finally set to go on trial in The Hague for the crime against humanity of murder. Without the determined efforts of the Filipino people, lawyers and civil society, this powerful exercise in international justice would not have been possible,” dugang pa niya.
Isip usa ka iladong kritiko sa drug war, ang iyang miaging pagbisita niadtong 2017 alang sa usa ka academic conference bahin sa drug policy ug sa ika-30 anibersaryo sa Commission on Human Rights (CHR).
Ang iyang pagbalik naghatag og bag-ong paglaum ug pagtagad sa mga isyu sa tawhanong katungod ug hustisya sa Pilipinas, ilabi na alang sa mga biktima sa kontrobersyal nga kampanya batok sa droga.

