Gibana-banang musobra sa kapin 5,000 ka mga opisyal nga gikan sa mga pamilyang politikal ang posibleng mawad-an og puwesto kon mapasar ang sugyot nga Anti-Political Dynasty bill sa Kamara.
Kini ang gibutyag ni Lanao del Sur Rep. Zia Alonto Adiong.
Matod ni Adiong, base sa unang pag-tuon sa Socioeconomic Research Bureau (SERB) sa House of Representatives of the Philippines gamit ang datos gikan sa Commission on Elections, mokabat sa 9,852 gikan sa 17,983 ka lokal nga posisyon o 54.8 porsyento ang gihuptan sa mga posibleng miyembro sa political dynasties gikan sa gibanabanang 4,239 ka pamilya.
Gipasabot sa mambabalaod nga ang bersyon sa sugyot sa Kamara nagdili magdungan sa pagdagan o paglingkod sa puwesto sa mga magkaparenti hangtod sa ikaduhang antas sa relasyon.
Base sa mga projection, labaw sa 5,000 ka elective positions ang mahimong mabakante kon ipatuman ang maong balaod, nga gilauman maghatag og mas daghang oportunidad alang sa mga bag-ong lider sa politika.