Gidakop ang dili moubos sa tulo ka Filipino nationals human gikumpirma sa kagamhanan sa Pilipinas ang kalambigitan niini sa giingong pagpang-espiya alang sa nasud sa China.
Sumala sa National Security Council (NSC), giisip kini nga usa ka seryosong hulga sa seguridad sa nasud.
Samtang ang mga suspisado miangkon na sa partisipasyon ug kasamtangan na nga nakigtambayayong sa mga awtoridad alang sa dugang imbestigasyon human niini gibutyag nga gihimo ang maong aktibidad sugod niadtong 2023 hangtod 2025, taliwala sa nagkagrabe nga tensyon sa West Philippine Sea.
Dugang pa nga usa sa mga akusado nibutyag nga nagsugod ang kalambigitan sa dihang junior staffer pa kini sa Department of National Defense (DND) human gitanyagan og bayad sa usa ka kailang Filipina aron magsulat og mga opinion articles.
Gidugang sa suspek nga wala dayon niini namatngonan nga alang diay sa interes sa China ang ginahimo, ug nalisdan na sa pag-atras tungod sa panginahanglan sa kwarta.
Sa kadugayan, ang maong buluhaton nahimong paghatag na og mga sensitibong impormasyon mahitungod sa mga plano sa depensa sa Pilipinas, ang kahimtang sa West Philippine Sea, ug ang pakig-alayon sa nasud ngadto sa Estados Unidos.
Sapagkakaron, malampuson na nga napahunong ang operasyon sa maong mga indibidwal nga naglihok ubos sa mando sa Chinese intelligence.