Nakapukaw sa kahadlok ang mga Overseas Filipino Worker OFW sa Bahrain tungod sa nagpadayong airstrike human sa pag-atake sa usa ka US Navy base duol sa ilang pinuy-anan. Kini human sa gilusad na pag atake sa Estados Unidos ug Israel ngadto sa Iran na mibalos usab sa pag atake ang Iran sa pipila ka US base sa middle east.
Sa pakighinabi sa Bombo Radyo Malaybalay kay Jossie Subog Butal, Bombo International Correspondent nga taga-Kitaotao, Bukidnon, nagsugod ang pagpangataki alas 11:30 sa udto sa milabayng adlaw. Mga 15 minutos lamang gikan sa iyang gipuy-an ang nahimutangang military base nga giingong target sa pag-atake.
Matod niya, kusog ang mga pagbuto nga nakapauyog sa balay ug naghatag og grabeng kulba ilabi na kay nag-inusara siya sa balay samtang na-stranded sa Saudi ang iyang amo. Gibawalan sila nga matulog sa taas ug gimandoan nga magpabilin sa ubos samtang nagpadayon ang sirena ug alerto.
Giingon usab niini nga ang mga OFW nga duol sa target area gi-evacuate na sa gobyerno sa Bahrain pinaagi sa bus ug gidala sa evacuation facility, samtang sila nga medyo layo pa wala pa gipabakwit apan permi ginamonitor sa mga awtoridad.
Sa pagkakaron, nihinay na ang mga pagbuto apan padayon ang alerto, ug nag-ampo si Butal alang sa kaluwasan samtang nagpasalig sa iyang pamilya sa Bukidnon nga luwas kini.