12 patay lakip ang usa ka senior official sa Hezbollah human ang Israel miatake sa Lebanon

Mikabat sa 12 ka tawo ang nakalas, lakip ang usa ka taas nga opisyal sa Hezbollah, human sa gihimong pagpangatake sa Israel didto sa Lebanon.

Base sa mga report, gilusad sa Israel Defense Forces (IDF) ang maong airstrike nga gitumong sa Bekaa Valley ug sa usa ka refugee camp. Giila sa Hezbollah ang ilang opisyal nga namatay nga si Hussein Yaghi. Matud pa sa Israel, ang maong operasyon gihimo isip tubag sa mga serye sa paglapas sa ceasefire ug aron gub-on ang mga “command center” nga gigamit sa grupo sa pagplano og mga pag-atake batok sa Israel.

Gawas sa mga namatay, duna usab mga samaran lakip na ang mga bata, butang nga mas nakapasamot sa tensyon sa maong rehiyon.