PANGANTUCAN, BUKIDNON – Patay ang usa ka 38-anyos nga lalaki human kini gilaslas ang liog ug gidunggab sa makadaghang higayon sa iyang kaugalingong kainom sa Decolores Village, Brgy. Poblacion, niadtong Pebrero 16, 2026, alas 10:00 sa gabii.
Pag-abot sa mga pulis sa dapit nga nahitaboan, nakit-an ang biktima nga wala nay kinabuhi samtang nagbitay sa iyang duyan ug naligo sa kaugalingong dugo. Gidala pa kini sa iyang mga paryente sa balay tambalanan apan gideklara sa mga doktor nga patay na.
Matud pa sa imbestigasyon sa Pangantucan Municipal Police Station nag-inom ang biktima ug ang suspek nga giila lang sa alyas “Tekboy” sa balay sa biktima. Nagtuo ang kapulisan nga nag-away ang duha tungod sa kahubog hangtod nga miresulta kini sa pagpamatay.
Human sa hitabo, ang suspek giingong miadto pa sa iyang silingan ug miangkon nga iyang napatay ang biktima sa wala pa kini miikyas.
Sa pagkakaron, gipangita na sa mga pulis ang suspek aron madakpan ug mapanubag sa iyang nabuhat nga krimen.