Buot palapdan sa Department of Agriculture (DA) ang programang “Benteng Bigas, Meron Na” sa Metro Manila aron mas daghang kabus ug bulnerableng sektor ang makabenepisyo sa P20 matag kilo nga bugas.
Sumala ni Agriculture Secretary Francisco Tiu Laurel Jr., target sa ahensya nga magbutang og dili moubos sa lima ka P20 rice outlets sa matag lokal nga panggamhanan sa National Capital Region ug naglaum nga ipatuman usab sa laing rehiton.
Pinaagi niini, tumong sa gobyerno nga mahatud ang barato nga bugas sa katawhan ug maminusan ang ilang adlaw-adlaw nga galastuon.
Matud usab ni DA-Agribusiness and Marketing Assistance Service Director Junibert de Sagun, gitinguhang mahuman ang full-scale expansion sa programa sa dili pa matapos ang bulan sa Marso tuig 2026. Kini aron matakdo sa panahon sa anihan ug masiguro nga adunay igo nga suplay sa bugas alang sa publiko.