Target karon sa Senado nga mapadali nga maaprobahan sa Senate ang Bill No. 1625, o ang “West Philippines Sea kon WPS Education Act,” nga nagtumong sa paghimo sa pagtuon sa maritime territory sa nasud nga kabahin sa basic ug higher education curriculum.
Nanawagan si Senate Committee on Foreign Relations Chairman Erwin Tulfo sa mga kaubang mambabalaod nga paspasan ang pagpasar sa maong balaodnon.
Matud niini, nga daghan pa sa mga Pilipino ang wala pay igong kahibalo kabahin sa West Philippine Sea ug uban pang teritoryo sa nasud, hinungdan nga kinahanglang aksyonan aron masiguro nga adunay hustong impormasyon ang mga Pilipino sa sitwasyon sa WPS.
Ubos sa maong balaodnon, ilakip sa mga syllabi sa basic ug higher education ang mga materyales sa pagkat-on nga iangay sa edad sa mga magtutungha.
Lakip matud pa sa materyales ang mga internationallly recognized facts, mga desisyon sa Korte Suprema ug mga balaod nga adunay kalambigitan kabahin sa West Philippine Sea.
Pinaagi sa pakigtambayayong sa Department of Education kon DepEd, Commission on Higher Education kon CHED, National Mapping and Resource Information Authority, National Security Council, Department of Foreign Affairs, ug uban pang mga hingtungdan nga ahensya sa gobyerno, ang mga materyales ug pagbansay mapalambo ug kung hingpit na nga mahimong balaod, kini mao ang mandato sa DepEd sa pagpahigayon sa katugbang nga pagbansay sa mga magtutudlo sa WPS Education.
Samtang, ang balaodnon nag-awhag usab sa mga State Universities and Colleges kon SUCs sa pagdugang sa panukiduki ug pagtuon sa maritime security ug governance, mga komunidad sa kabaybayon ug uban pang importanteng kahibalo nga adunay kalabotan sa WPS.