Liboan ka mga tawo sa Denmark ug Greenland ang nagprotesta aron babagan ang sugyot ni U.S. President Donald Trump nga paliton ang Greenland gikan sa Denmark.
Giingon nila nga ang Greenland mismo ang angay magdesisyon sa kaugmaon niini.
Sa Copenhagen, nagmartsa ang mga nagprotesta padulong sa embahada sa US.
Nagsinggit sila og “Greenland is not for sale” ug nagdala og mga banner nga “No means No” at “Hands off Greenland” uban sa pula ug puti nga bandila sa Greenland.
Adunay usab pipila nga nagsuot og pulang kalo nga parehas sa “Make America Great Again” ni Trump, pero ang adunay sulat nga “Make America Go Away.”
Gibanabana nga kapin sa 20,000 ka tawo ang mitambong sa protesta sa Copenhagen.
Hapit pareho kini sa gidaghanon sa mga tawo sa Nuuk, ang kapital sa Greenland.
Adunay usab mas gamay nga mga protesta sa ubang lugar sa Denmark.
Sa Nuuk, gatusan ka demonstrador, lakip ang Prime Minister nga si Jens-Frederik Nielsen, ang nagmartsa padulong sa US consulate.
Nagdala sila og mga bandila ug banner.
Sa miaging panahon, miingon si Trump nga importante ang Greenland sa seguridad sa US tungod sa lokasyon niini ug sa mga mineral nga naa didto.
Wala niya isalikway ang posibilidad nga gamiton ang kusog militar aron makuha ang isla, tungod sa iyang pahayag, nahimong problema kini sa relasyon sa US ug Denmark, ug gikondena kini sa NATO.
Ang Greenland, nga adunay kapin 57,000 ka mga lumulupyo, adunay dako nga autonomy sukad pa sa 1979, apan nagpabilin gihapon kini ilalom sa Denmark sa mga butang nga may kalabutan sa depensa ug foreign policy.
Kapin 17,000 ka mga Greenlander ang nagpuyo sa Denmark, ug ang tanang lima ka partido sa parliament sa Greenland pabor sa pagkab-ot sa kagawasan sa umaabot.
Apan mas gipili nila sa karon nga magpabilin uban sa Denmark kaysa mouban sa Amerika.