Narekober sa mga pwersa sa seguridad ang gitagoan nga mga armas lakip na ang mga component sa improvised explosive device (IED) atol sa usa ka joint internal security operation nga gihimo sa hilit nga bahin sa Barangay Concepcion, Valencia City, alas 12:20 sa udto niadtong Enero 9, 2026.
Ang operasyon gipangunahan sa Regional Mobile Force Battalion 10 (RMFB 10) ilawom sa liderato sa 1003rd Maneuver Company, uban ang suporta sa 1004th Maneuver Company RMFB 10, 2nd Provincial Mobile Force Company Bukidnon, Bukidnon Provincial Explosives and Canine Unit, ug 89th Infantry Battalion, 10ID PA, uban sa giya sa usa ka misurender nga informant.
Lakip sa mga narekober nga war materials mao ang usa (1) ka M16 rifle nga adunay itom nga sling ug dunot na nga serial number, 44 ka bala sa 5.56mm, tulo (3) ka short steel magazine alang sa M16, ug duha (2) ka steel container nga puno sa mga IED components.
Human sa pagkadiskubre sa mga kagamitan, gilayon nga gideploy ang Quick Reaction Team aron siguruon ang lugar ug motabang sa pagkuha sa mga narekober nga materyales.
Padayon usab ang pag-scan sa kasikbit nga lugar aron masiguro nga wala nay lain pang tinago nga armas o eksplosibo.
Gipasiugda niini nga ang pagsalig ug aktibong partisipasyon sa katawhan maoy yawe sa pagpadayon sa kalinaw ug kahusay sa Bukidnon.