Imbes nga Cabral files, gitawag na karon sa Malacañang nga “Leviste files” ang mga dokumentong gunit ni Batangas Congressman Leandro Leviste kabahin sa mga project proponents sa DPWH.
Matod pa ni Palace Press Officer Undersecretary Claire Castro, kasamtangan na kining gi-imbestigahan sa Ombudsman aron sutaon kung duna ba’y kamatuoran ang maong mga dokumento. Subay sa giingon ni Assistant Ombudsman Mico Clavano, dili pa matawag nga conclusive evidence ang maong mga dokumento tungod kay pwede kini nga usbon o i-edit sa ubang tawo.
Nakita usab nga daghan og bersyon ang maong Leviste files gikan sa nagkalain-laing gigikanan nga wala nagkatugma. Gipasiugda ni Castro nga magpabilin kini nga mga hungihong lang hangtod nga walay lig-on nga ebidensya. Paabuton na lang kuno ang opisyal nga pamahayag sa Ombudsman bahin niini.
Sa pikas bahin Hugot nga gihimakak ni ACT Teachers Party-list Representative Antonio Tinio ang mga nanggawas nga allegasyon gikan ni Batangas 1st District Representative Leandro Leviste mahitungod sa gikaingong tag P2 milyon nga “Secret Christmas Bonus” alang sa mga myembro sa House of Representatives.
Kahinumdoman nga gibutyag ni Leviste nga nakadawat ang mga magbabalaod og tag P2 miyon nga tseke isip bonus, apan gihangyo matud pa kini nga dili kini ipahibalo sa publiko. Dugang pa, adunay nahitabong “panic” sa mga kongresista gumikan nahibaw-an nga adunay gikuptan nga mga kopya sa maong mga tseke si Leviste.
Apan sa usa ka eksklusibong pakighinabi sa Bombo Radyo Philippines, giklaro ni Rep. Antonio Tinio nga wala’y kamatuoran ang maong mga pasangil.