Gipatin-aw sa Land Transportation Office (LTO) Malaybalay nga wala sa ilang hurisdiksiyon ang pagtakda sa plete sa mga pampasaherong sakyanan ug wala pay natala nga reklamo sa fixing sulod sa ilang buhatan.
Sa pakighinabi sa Bombo Radyo Malaybalay kay Juntelie Goc-ong, hepe sa LTO Malaybalay, na matod pa niini ang Local Government Unit (LGU) pinaagi sa tariff board maoy nagtakda sa plete sa motor-tricycle, samtang ang LTFRB maoy responsable sa multi-cab, busa dili sakop sa mandato sa LTO ang mga reklamo sa lain-laing plete ilabi na sa oras sa kagabhion.
Samtang may kalabotan sa isyu sa fixing sa rehistrasyon o eksaminasyon, gipahayag ni Goc-ong nga wala pay sumbong nga nadawat batok sa LTO Malaybalay. Iyang gidasig ang publiko nga ireport dayon sa tukmang ahensiya ang bisan unsang ilegal nga kalihokan aron masuta ug maatubang dayon.
Gipasalig sa LTO Malaybalay ang transparency ug hapsay nga serbisyo, samtang nagpadayon ang ilang panawagan sa katawhan nga mosunod sa hustong proseso ug moduol sa angay nga ahensiya alang sa ilang mga reklamo.