Pasakaan og kasong kriminal ang kapin 40 ka indibidwal nga giingong pasimuno sa protesta batok korapsyon niadtong Septiyembre 21 ning tuiga, sumala sa Criminal Investigation and Detection Group (CIDG).
Matod ni CIDG Major General Robert Alexander Morico III, lakip sa mga giimbestigahan ang mga lider sa riot nga gilusad sa lain-laing grupo nga gitawag og Trillion Peso March. Gipugngan ni Morico ang pagbutyag sa identidad sa mga pasakaan ug kaso na indibidwal samtang nagpadayon pa ang imbestigasyon.
Target sa CIDG nga isumite ang mga kaso posibleng sa sunod semana. Gipasiugda ni Morico nga dili lang ang gagmay nga tawo ang ilang tutukan, kundili apil usab ang mga dagkong personalidad nga nalambigit sa kalihukan.
Kahinumduman nga sa tunga sa protesta niadtong Septiyembre 21, dunay pipila ka demonstrador nga nangdaot sa mga kabtangan sa gobyerno, hinungdan nga gitutokan sa CIDG ang pagpangita sa mga responsable sa likod sa kagubot.