Gipadayag sa Department of Trade and Industry (DTI) nga andam na silang ipresentar ang ilang mga nadiskobrehan kabahin sa 15 ka government contractors nga nakadawat og P100 bilyon nga pondo alang sa mga flood control projects sulod sa tulo ka tuig.
Matod ni DTI Secretary Ma. Cristina Roque, ipasa nila ang findings sa Independent Commission for Infrastructure (ICI) aron kini maoy motunol sa tinuod nga detalye sa mga contractors nga nalambigit. Gibutyag usab ni Roque nga gi-reporma na ang Philippine Contractors Accreditation Board (PCAB) human sa mga alegasyon nga adunay mga dili kwalipikadong contractors nga nagbayad og milyon-milyon aron makakuha sa accreditation.
Gidugang pa niini nga wala na nila gipangayo karon nga rekisito ang pagpanag-iya og construction company aron malikayan ang conflict of interest. Kahinumduman nga gipasaka na sa PCAB ang kanselasyon sa lisensya sa siyam ka kompanya nga gipanag-iya nila Curlee ug Sarah Discaya nga nalambigit sa kwestyonableng flood control projects.