46 ka tawo patay sa aksidente sa Uganda

Gikan sa 63, gikunhuran sa kapulisan sa 46 ang kumpirmadong patay sa bus crash sa Uganda.

Base sa inisyal nga imbestigasyon, duha ka bus ang nag-overtake sa parehas nga linya sa Kampala-Gulu Highway hangtod ilang nasugat ang usa ka trak ug sakyanan.

Misulay pa ang mga bus nga malikayan ang kasugat nga mga sakyanan, apan wala gihapon nila malikayi ug usa pa ka bus ang nabaliskad sa ilang pagtagbo.

Gidala sa tambalanan ang pipila ka pasahero nga naangol sa managlahing parti sa ilang lawas.

Mipadayag sa iyang pahisubo ug simpatiya si Ugandan President Yoweri Museveni, diin iyang gisaad nga tagaan sa tabang nga nagkantidad og $1,430 ang mga pamilya sa mga biktima.