Nakabsan sa kinabuhi ang usa ka 55-anyos nga lalaking negosyante gikan sa Barangay Manga, Pagadian City human kini mikalit og kahagba sa Purok 4, Batingtingan, Manolo Fortich, Bukidnon, kagahapon sa buntag, Miyerkules, Nobyembre 18, 2026.
Subay sa impormasyon, mibiyahe ang biktima kauban ang iyang asawa padulong sa Menzi Village aron mamalit ug lanzones alang sa ilang negosyo.
Sa inisyal nga imbestigasyon sa Manolo Fortich Municipal Police Station, nag-estoryahanay pa ang magtiayon sulod sa ilang nakaparadang sakyanan alas-5:30 sa buntag sa wala pa mikanaog ang biktima aron magpahangin, diin kalit kining nakasinati og grabeng kasakit ug nawad-an og panimuot hinungdan nga nahagba kini ug nasamad ang ibabaw nga bahin sa iyang agtang.
Dali pa siyang gidala sa Bukidnon Provincial Hospital sa Manolo Fortich apan gideklarar na kining dead on arrival alas-8:00 sa buntag, diin nasayran usab sa kapulisan nga adunay dugay nang naghambin og hypertension ang biktima ug nagtumar og maintenance medication.

