Grabe nga kaso ang giatubang karon sa 114 ka gasoline stations sa Pilipinas human sila napamatud-ang wala misunod sa gipatuman nga oil price rollback, nga nag-aghat sa Department of Energy (DOE) nga mohimo og lig-ong legal nga aksyon.
Kini ang gipadayag ni Oil Industry Management Bureau Dir. Rino Abad, kinsa mibutyag nga sa 213 ka gasoline stations nga ilang gisusi gikan Nobyembre 10 hangtod 13, 114 niini ang nakit-ang wala nagpatuman sa saktong pagkunhod sa presyo.
Sumala sa ahensya, kulang o dili tukma ang gipatuman nga bawas-presyo sa pipila ka estasyon, imbes ang husto nga rollback.
Niadtong Biyernes, pormal nang gi-endorso sa grupo ang inspection report ngadto sa legal department sa DOE alang sa tukmang legal action.
Duha ka nag-unang balaod ang gamiton sa pagtuon sa mga dokumento sa higayon nga moabot sa pormal nga demanda ang mga paglapas.
Ang una mao ang Oil Regulation Law, diin ang paglapas sa mandated price adjustment adunay silot sa korte nga 3 ka bulan hangtod 1 ka tuig nga pagkapriso ug multa nga 50,000 hangtod 300,000 piso.
Ang ikaduha mao ang Presidential Decree 1865, partikular ang Section 2(E) batok sa overpricing sa petroleum products.
Ubos niini, ang molapas nag-atubang og administrative fine nga 10,000 piso, suspensyon o pagbawi sa permit, ingon man criminal penalty nga 20,000 hangtod 50,000 piso ug pagkapriso sa 2 hangtod 5 ka tuig.
Isip kabahin sa proseso, gihatagan og 72 oras ang maong mga estasyon aron magsumite og katin-awan pinaagi sa show cause order.
Kadaghanan sa ilang katarungan mao ang pagkaka-stock sa mga produkto nga nakuha sa mas taas nga presyo gikan sa ilang mother companies sa miaging semana.
Apan, giklaro sa ahensya nga natuki na kini kauban ang legal services ug mga oil companies, diin napagkasunduan nga ang pagkunhod sa presyo kinahanglan ipatuman kung adunay price rollback, sama sa pagtaas niini kung mahal ang produkto.
Kini nga mga panghitabo nagsunod sa bag-ong oil price rollback nga gipatuman sa Department of Energy (DOE), diin adunay bawas nga 1.50 piso sa kada litro sa gasolina, 3.80 piso sa diesel, ug 5.80 piso sa kerosene.

