Duha ka lalaki ang naangol sa managlahing insidente sa pagpangdunggab sa dakbayan sa Malaybalay ug lungsod sa Quezon, Bukidnon.
Kritikal ang kahimtang sa usa ka 33-anyos nga truck driver human dunggaba sa iyang 27-anyos nga helper gamit ang tari o bulang sa manok sa Sitio Incalabog, Barangay Can-ayan, Malaybalay City, alas 4:00 sa kadlawon.
Gibalhin na ang biktima sa Northern Mindanao Medical Center sa Cagayan de Oro City, samtang gipailalom sa hospital arrest ang suspek ug giandam na ang kasong frustrated homicide batok kaniya.
Samtang, samad sa wala nga ilok ang naangkon sa usa ka 46-anyos nga lalaki human dunggaba sa sundang sa usa ka tawo nga giingong nagselos human nakita ang biktima nga gikuyogan ang iyang asawa pauli sa ilang puy-anan sa Barangay Kiburiao, Quezon, alas 11:30 sa gabii.
Naospital ang biktima, samtang mikalagiw ang suspek ug gipangita na pinaagi sa hot pursuit operation sa kapolisan.

