Nakaangkon og samad pinusilan ang usa ka 39-anyos nga drayber ug bun-og ug pangos usab ang iyang pasahero human sila giatake sa wala mailhing suspek sa Purok 5A, North Poblacion, Maramag, Bukidnon, pasado alas 4:00 sa hapon niadtong Biyernes, Nobyembre 13.
Gidala dayon ang duha sa Bukidnon Provincial Hospital-Maramag alang sa pagpatambal ug anaa na karon sa luwas nga kahimtang. Giila ang drayber sa alyas Tonyo, residente sa South Poblacion, samtang ang iyang 55-anyos nga pasahero taga-Zubiri Village, North Poblacion.
Base sa imbestigasyon sa kapulisan, gisundan sila sa suspek nga nagsakay og pulang Honda Wave, sa wala pa kini mibunot og armas ug sunod-sunod nga gipusil ang drayber nga naigo sa wala nga bahin sa ilok.
Narekober sa crime scene ang lima ka basiyo sa bala nga kalibre .45 samtang nagpadayon ang hot-pursuit operation sa kapulisan aron madakpan ang suspek.

