Misaka sa 96.1% ang employment rate sa Pilipinas niadtong Mayo 2025, kini mas taas tandi sa 95.8% nga natala niadtong bulan sa Abril, base sa pinakabag-ong datos nga gipagawas sa Philippine Statistics Authority (PSA).
Ang pagsaka sa employment rate nagpasabot nga may 50.29 milyon ka Pilipino ang adunay trabaho niadtong Mayo, kumpara sa 48.87 milyon nga natala sa miaging buwan. Sa laing bahin, ang unemployment rate mitaas sa 3.9% o katugbang sa 2.03 milyon ka Pilipinong walay trabaho.
Sa datos sa PSA, nakita usab nga mikunhod ang underemployment rate ngadto sa 13.1% gikan sa 14.6% sa bulan Abril.
Bisan pa man niini, kini mas taas gihapon kumpara sa 9.9% nga natala sa susamang bulan sa tuig 2024.
Ang underemployment naglangkob sa mga tawo nga aduna nay trabaho apan wala makatagamtam sa igo nga kita o hustong oras sa pagtrabaho.
Gipasabot sa PSA nga ang pagtaas sa employment rate kasagaran nga nakit-an atol sa election season, diin may daghang oportunidad alang sa temporaryo ug informal nga trabaho nga halos gigamit sa kampanya ug electoral-related nga mga kalihokan.