Nagtuo si Atty. Oscar Moreno, kanhi gobernador ug mayor sa Cagayan de Oro City ug propesor sa College of Law sa Xavier University, nga wala pa hingpit matubag sa mga testigo sa depensa ang mga pangutana kalabot sa gikwestiyon nga bahandi ni Vice President Sara Duterte atol sa impeachment proceedings.
Matud pa ni Moreno, responsibilidad sa depensa nga ipatin-aw kung asa gikan ang mga kuwarta ug unsay basihan sa mga bayad nga nalambigit sa mga kompanyang giingong adunay koneksiyon sa Bise Presidente.
Gikwestiyon usab ni Moreno ang paghulagway sa usa ka testigo nga adunay loose investment ang Bise Presidente sa GenCorp ug MetroChau, tungod kay sumala kaniya, ang pagpamuhunan kinahanglan adunay klarong basihan ug dokumentasyon.
Dugang pa niya, kinahanglan pang dugangan sa depensa ang mga ebidensiya aron matubag ang mga rekord sa bangko ug ang gikwestiyon nga kalainan sa kantidad sa puhunan ug sa nahimong kita niini.
Gibutyag usab ni Moreno nga mahimong makadugang sa kabug-at sa isyu ang gikatahong pagdawat sa GenCorp og 33 milyones pesos nga kontrata gikan sa lokal nga kagamhanan sa Davao City.

