Mga robot, maoy gipadumala sa convenience store sulod sa 24 oras sa China

Unom ka humanoid robots ang gipasaligang modumala sa usa ka convenience store sa Xuhui district, Shanghai, China, sulod sa 24 oras isip pagsulay sa ilang abilidad sa pagtrabaho nga walay kanunayng tabang sa tawo.

Gipahimo sa kompanyang Agibot ang mga robot sa pag-atiman sa mga kustomer, pagpuno sa mga estante, pagtimpla og kape, pag-andam og pagkaon ug pagpanglimpyo.

Nakahuman sila og 1,730 ka buluhaton, apan upat lamang ang nakapasar sa ebalwasyon.

Napakyas ang duha ka robot tungod sa kalisod sa pag-atubang sa mga babag ug pagdumala sa ilang mga buluhaton, nga nagpakita nga bisan mahimo nang mopuli ang mga robot sa pipila ka trabaho sa tindahan, aduna pa silay mga limitasyon sa aktuwal nga operasyon.