Gikahadlokan kaniadto nga “Pharaoh’s Curse” karon nakita nga posibleng yawi batok sa kanser, human ang mga siyentista gikan sa University of Pennsylvania nakadiskobre nga ang Aspergillus flavus, usa ka matang sa fungus nga makita sa lubnganan ni Pharaoh Tutankhamun nga adunay abilidad sa pagpamatay sa mga selula sa leukemia.
Kahinumduman nga niadtong 1920s, mikaylap ang kasikas sa gitawag nga “sumpa sa Pharaoh” human ang pipila sa mga arkeologong gipangulohan ni Howard Carter nagsakit ug namatay diin nga giablihan nila ang lubnganan ni Tutankhamun.
Usa usab ka susamang insidente ang natala sa Poland niadtong 1970s, diin halos tanang tawo nga misulod sa usa ka lubnganan namatay. Sa pagtuon sa mga eksperto, nasuta nga ang hinungdan niini ang fungus nga Aspergillus flavus, nga mahimong makaapekto sa baga ug mosangpot sa seryosong mga sakit.
Gitutukan na kini sa siyensiya diin nga ang fungus adunay abilidad sa pagpamatay sa cancer cells, partikular sa mga kaso sa leukemia. Matud ni Prof. Sherry Gao, usa sa mga nanguna sa research, diin dako ang potensyal nga mahimong basehan sa bag-ong klase sa tambal ang maong fungus.
Gipasiugda ni Gao, nga daghang natural nga kahinguhaan ug organismo sa kinaiyahan ang posibleng yawe sa pagtambal sa grabeng mga sakit.