Mikabat na sa rekord nga P19.66 trilyon ang kinatibuk-ang utang sa gobyerno sa Pilipinas sa pagtapos sa Septyembre 2026, sumala sa pinakabag-ong datos sa Bureau of the Treasury (BTr).
Misaka kini og P53.47 bilyon o 0.27 porsyento kon itandi sa P19.61 trilyon nga utang nga natala sa miaging Agosto.
Gilangkuban ang kinatibuk-ang utang sa P13.25 trilyon nga domestic debt o 67.39 porsyento, samtang P6.41 trilyon niini ang external debt o katugbang sa 32.61 porsyento.
Gipasabot sa BTr nga ang pagdugang sa domestic debt nalambigit sa pag-isyu og dugang government securities ug sa pagkunhod sa bili sa piso batok sa dolyar, nga nakaapekto usab sa kantidad sa Onshore Dollar Bonds.
Misaka usab og 0.70 porsyento ang external debt tungod sa paghuyang sa piso ug dugang nga pagkuha og pautang gikan sa mga langyaw nga nagpautang.
Samtang, mikunhod sa P306.63 bilyon ang national government guaranteed obligations sa maong bulan, resulta sa pagbayad sa gobyerno sa pipila ka external guarantees.