Nanawagan si United Nations Secretary-General Antonio Guterres og dinaliang pagpakunhod sa tensyon sa Middle East ug ceasefire sa Ukraine, pipila ka adlaw sa wala pa ang high-level week sa 81st UN General Assembly sa New York.
Matud ni Guterres, kinahanglan mahimong prayoridad ang pagpugong sa dugang nga pagsamot sa tensyon sa Middle East tungod kay padayon nga mga sibilyan ang naapektuhan sa mga panagbangi.
Gihangyo usab niya ang tanang kampo nga undangan ang mga lakang nga makadaot sa mga sibilyan ug siguruhon nga luwas ug walay babag ang paghatod sa humanitarian aid ngadto sa mga nanginahanglan.
Nanawagan usab ang UN chief nga respetuhon ug ibalik ang katungod ug kagawasan sa paglayag sa Straits of Hormuz ug Bab al-Mandab, subay sa international law.
Sumala pa ni Guterres, ang de-escalation, diplomasya ug dialogue mao ang mga pamaagi aron masulbad ang mga tensyon.