Padayon ang Commission on Elections (COMELEC) sa dakbayan sa Malaybalay sa ilang pagpangandam alang sa Barangay ug Sangguniang Kabataan Elections (BSKE) karong Nobyembre 2, 2026, taliwala sa opisyal nga pag-aproba sa House of Representatives sa ikatulo ug pinal nga pagbasa sa balaodnon nga nag-oktaba sa maong piniliay ngadto sa tuig 2028. Gipasabot ni Malaybalay City Election Officer Atty. Danilo N. Dividina nga nagpabilin nga Republic Act 11935 ang nag-unang balaod nga ilang pagasundon.
Gihimug-atan ni Dividina nga kinahanglan pa kining aprobahan sa Senado, ipaagi sa bicameral conference, ug pirmahan sa Presidente uban sa 15 ka adlaw nga publication sa wala pa kini opisyal nga maimplementar. Tungod niini, nagpabilin gihapon nga gipangandaman sa ilang buhatan ang filing sa Certificate of Candidacy (COC) karong Setyembre 28 hangtod Oktubre 5.
Gipasidaan usab sa opisyal nga kon ugaling madayon ang pag-oktaba sa piliay sa tunga-tunga sa ilang preparasyon, gilauman nga mokabat sa ₱3 bilyon nga pondo sa mga magbubuhis ang posibleng masayang tungod sa nagapadayon nga pag-imprenta sa mga opisyal nga balota ug pagpamalit sa mga kagamitan.
Tungod niini, nagpahimangno si Dividina sa mga gustong modagan ug sa publiko nga magdepende lamang sa mga opisyal nga pahibalo sa COMELEC ug sa mga lehitimong estasyon sa balita imbes sa mga dili kumpirmadong dungog-dungog sa social media.