Nakasakmit ang Police Regional Office 10 (PRO10) og dul-an 320 gramos sa gituohang shabu nga nagkantidad og ₱2,176,000.00 ug nadakpan ang tulo ka indibidwal sa duha ka magkalahing buy-bust operation nga gipahigayon sa Cagayan de Oro City niadtong Setyembre 5, 2026.
Ang unang operasyon natigayon sa Zone 1, Barangay Balulang sa may alas 1:29 sa kaadlawon pinaagi sa City Drug Enforcement Unit (CDEU), Cagayan de Oro City Police Office (COCPO), ug City Mobile Force Company (CMFC), diin nadakpan ang duha ka suspek nga sila si alyas “Ronron,” 32 anyos, mekaniko sa motor, ug residente sa Brgy. Lumbia nga giila nga High-Value Individual (HVI), kauban ang iyang courier ug runner nga si alyas “Jimboy,” 23 anyos nga residente sa Barra, Opol.
Nakuha gikan kanila ang 8 ka sachet sa ilegal nga droga nga motimbang og 220 gramo ug nagkantidad og ₱1,496,000.00 uban sa mga packaging tools, weighing scale, ug buy-bust money.
Sa susamang insidente, sa ikaduhang operasyon sa Bolonsori, Barangay Camaman-an sa may alas 2:54 sa kaadlawon nga gipangulohan sa Regional Police Drug Enforcement Unit (RPDEU) 10 kauban ang Police Station 2 sa COCPO.
Nasikop ang usab ang first-time offender nga si alyas “AL,” 40 anyos nga caretaker sa yuta, kinsa nagahimo sa iyang transaksyon sa iyang balay tungod sa hilom ug kabukiran niining nahimutangan.
Nakumpiska gikan niini ang 7 ka sachet sa giposteng shabu nga nagtimbang og 100 gramo nga nagkantidad og ₱680,000.00 ug buy-bust money.
Ang tanang ebidensya gitugyan na sa Regional Forensic Unit 10 samtang ang mga suspek gidala sa custody sa COCPO diin giandam na ang mga kasong paglapas sa Sections 5 ug 11, Article II sa Republic Act 9165 (Comprehensive Dangerous Drugs Act of 2002) batok kanila.