Nakatagamtam na usab og dakong kapildihan ang Gilas Pilipinas human gipukpuk sa host team nga South Korea, 42-69, sa ilang ikaduhang tune-up game alang sa Hana Bank Invitational didto sa Suwon, South Korea.
Si Zav Lucero lamang ang nakatala og double digits alang sa nasyunal nga koponan pinaagi sa iyang 14 puntos, samtang nidugang og siyam ka puntos si Adrian Nocum. Nahimong mas lisod pa ang kahimtang sa Gilas human naangol ang ilang big man nga si Justin Arana tungod sa right ankle sprain sa ikaduhang kwarter diin wala na kini makabalik sa pagduwa.
Kini na ang ikaduhang sunod-sunod nga pilde sa Pilipinas batok sa South Korea nga nagtapos sa ilang exhibition series nga walay kadaugan (0-2), pipila na lang ka adlaw sa dili pa nila sugdan ang pagpanalipod sa ilang titulo sa Asian Games sa Japan diin ilang makasangka ang Bahrain karong Setyembre 11.