Gihangyo sa Malacañang ang mga senator-judges nga magpabiling patas ug walay gidapigan sa impeachment trial ni Vice President Sara Duterte, ug dili molihok ingon nga abogado sa depensa.
Matud ni Palace Press Officer Usec. Claire Castro, ang katungdanan sa mga senator-judges mao ang pagpangutana alang sa pagklaro sa mga isyu, ug dili ang pag-cross examine o pakiglalis sa mga testigo.
Gibutyag usab ni Palace Press Officer Usec. Claire Castro nga husto lamang ang desisyon sa Korte Suprema sa pagbasura sa mga petisyon batok sa impeachment proceedings batok kang Vice President Sara Duterte, gumikan ang kaso wala na sa House of Representatives ug anaa na sa Senado isip Impeachment Court.
Dugang pa ni Castro nga usa sa iyang namatikdan sa impeachment trial mao ang panglantaw sa usa ka senator-judge nga ang Special Disbursing Officer (SDO) lamang ang angay manubag.
Matud ni Castro, adunay angay usab manubag ang pinuno sa ahensya sa pagdumala ug paggamit sa pondo sa gobyerno.