Giatras ni U.S. President Donald Trump ang planong bag-ong pag-atake batok sa Iran samtang nagpadayon ang negosasyon aron mapahunong ang nuclear program sa Tehran ug maablihan pag-usab ang Strait of Hormuz.
Sa iyang post sa Truth Social, giingon ni Trump nga miuyon kining iurong una ang pag-atake human mangayo og dugang panahon ang Iran ug pipila ka nasud sa Middle East aron makompleto ang usa ka kasabutan.
Matud niini, gisuportahan usab sa Israel ang maong lakang, apan mahimo gihapon nga ipadayon ang pag-atake kon mapakyas ang negosasyon.
Giingon sa Israel nga magpadayon kini sa paglihok batok sa Iran kon ipadayon sa Tehran ang nuclear program ug pagpalig-on sa ballistic missile capabilities niini.
Sa bahin sa Iran, giingon sa acting defense minister nga ang mga hulga sa Estados Unidos kabahin lamang sa “psychological warfare,” apan andam gihapon ang ilang militar sa bisan unsang posibleng pag-atake.
Nanawagan ang Saudi Arabia sa padayon nga diplomasya ug dayalogo aron mapakunhod ang tensyon sa rehiyon.