Pormal nang gipasa sa Kamara de Representantes ang House Bill 10345 nga nagtumong sa pagpataas sa limitasyon sa tinuig nga sweldo nga libre sa income tax ngadto sa ₱350,000, subay sa panawagan ni Presidente Ferdinand “Bongbong” Marcos Jr. sa iyang ika-limang State of the Nation Address (SONA).
Gipangunahan ni House Speaker Faustino “Bojie” Dy III ug House Majority Leader Sandro Marcos ang pagpasa sa maong balaodnon. Kon hingpit nga maaprubahan, mag-epekto ang bag-ong tax scheme karong Enero 1, 2027, diin ang mga empleyado nga adunay tinuig nga kita nga dili molapas sa ₱350,000 walay babayaran nga buwis.
Matud sa mga lider sa Kamara, gihimo ang maong lakang aron hatagan og dugang nga magamit nga kwarta (disposable income) ang mga low ug middle-income earners taliwala sa padayong pagtaas sa presyo sa mga pangunang palaliton, nga makatabang usab sa pagpalambo sa lokal nga ekonomiya.
Gilauman sa House Committee on Ways and Means nga maaprubahan ang maong lakang sa dili pa matapos ang sunod nga bulan.