Sulod na sa ikaduhang hugna sa Mubadala DC Open ang Filipina tennis star nga si Alex Eala human mapukan si Qinwen Zheng sa China pinaagi sa impresibong comeback victory, 4-6, 6-4, 6-1.
Gikan sa kapildihan sa unang set, nakabawi si Eala ug gidaog ang sunod nga duha ka set aron makuha ang tiket padulong sa Round of 16 sa maong WTA 500 tournament.
Pinaagi sa maong kadaugan, nabawian usab ni Eala ang iyang kapildihan batok kang Zheng sa ilang tulo ka set nga panagtagbo sa Asian Games tulo ka tuig na ang milabay.
Sunod nga makaatbang ni Eala ang Fil-Canadian tennis star nga si Leylah Fernandez, ang defending champion sa torneyo. Una nang midaog si Fernandez batok kang Eala sa ilang unang panagsangka sa Stuttgart Open niadtong Abril.
Si Fernandez, nga adunay Filipino ug Ecuadorian nga kaliwat, natawo sa Canada ug kanunay nagpahayag sa iyang garbo sa iyang Filipino heritage. Ang iyang inahan nga si Irene Exevea usa ka Filipino-Canadian, samtang ang iyang mga apohan sa bahin sa inahan gikan sa Pilipinas.
Gikatakdang mag-atubang sila Eala ug Fernandez karong Huwebes, Hulyo 30, 2026 alang sa ilang ikaduhang panagtagbo sa WTA Tour.