Nakaangkon og samad pinusilan ang usa ka 49-anyos nga lalaki sa Purok 7, Barangay Poco-poco, Damulog, Bukidnon, pasado alas 7:00 sa gabii niadtong adlawng domingo.
Ang biktima, nga giila sa alyas “Antonio,” naigo sa pagpamusil apan luwas ug gidala dayon sa Bukidnon Provincial Hospital sa Kibawe alang sa tambal.
Base sa inisyal nga imbestigasyon, gikan ang biktima sa balay sa iyang igsoon diin nag-charge kini sa cellphone sa wala pa miuli sa iyang panimalay.
Apan samtang naglakaw, kalit siyang gipusil sa makadaghang higayon sa duha ka wala mailhing mga suspek nga dayon miikyas padulong sa habagatang bahin sa lugar.
Giingon sa biktima nga wala siya makaila sa mga mipusil kaniya ug wala usab siyay nahibal-an nga motibo o personal nga kasamok nga mahimong hinungdan sa pag-atake.
Narekober sa mga imbestigador sa crime scene ang tulo ka basiyo ug tulo ka buhing bala sa kalibre .45 nga pistola, nga gipadala na sa forensic unit alang sa ballistic examination.
Gipahigayon na ang hot pursuit operation sa kapulisan aron mailhan ug madakpan ang mga suspek ug matino ang motibo sa pagpamusil.